Kirchenmusik

Chillemuusig (au Sakralmuusig oder latynisch Musica sacra) isch die Vokal- und Instrumentalmuusig, wo für Gottesdienst in dr Chille bestimmt isch. Tüpischi chillemusikalischi Forme si Verdoonige vo dr Mäss und Motett, Choräl und äistimmigi Chillegsäng. Choralvorspiil für Orgle und anderi Instrumentalmuusig in underschiidlige Bsetzige, wo mit ene die kultische Handlige im Gottesdienst undermoolt wärde, zele eebefalls zur Chillemuusig.

Vo dr Chillemuusig wird die allgemäini gäistligi Muusig underschiide, wo nit bestimmt isch, im Gottesdienst ufgfüert z wärde. Bischbil für sonigi gäistligi Muusigwärk si d Oratorie vom Georg Friedrich Händel, d Psalmesinfonie vom Franz Liszt und vom Igor Strawinsky oder s Düütsche Rekwiem vom Johannes Brahms. D Bach-Passione hingege wärde as Chillemuusig aagluegt, wil si gschriibe worde si, zum in dr Passionsliturgii ufgfüert z wärde.

Allgemäiner gfasst wird mänggisch alli Muusig, wo im chirchlige Beriich gspiilt wird, as Chillemuusig bezäichnet. Denn ghööre au d Brobe vo de Kantoreie, s Singe mit Chinder im e Zältlaager, wenn s uf biblischi Theme goot, und die Orgelekonzärt, wo men ne en spirituelle Sinn git, und äigetlig alli Muusig, wo mit Religion und Chille z due het, zur Chillemuusig.

Chillemusiker und Chillemusikerinne spiile als Aagstellti vo de Pfarreie und Chillegmäinde d Muusig i dr Chille sälber, vilmol as Organist, oder si sind Choorläiter oder läite Muusiggrubbe wie Chillechöör, Schole oder Posuunechöör. Si studiere mit dene Grubbene musikalischi Wärk ii, wo bi Gottesdienst ufgfüert wärde.

Es git eigeti Muusigliteratur, Fachorganisazioone, Schuele und Zytschrifte für d Chilemuusig.^[1]

Dr Bischof Ambrosius vo Mailand het im 4. Joorhundert s Singe i dr Chille gförderet. D Muusig vo de Benediktinerchlöschter und dr Gregorianisch Gsang sind wichtegi Wurzle vo dr Chillemuusig. Im Middelalter sind d Melodie i de Mässbüecher ufgschribe worde.

Als Patronin vo dr Chillemuusig gilt sid em 14. Joorhundert die häilegi Cäcilia.

1. ↑ s ökumeenische Internet-Portaal für d Chillemuusig i dr Schwiiz uf kirchenmusik.ch